Кымызны өйдә дә ясап була

Сыер сөтеннән ясалган кымызда С витамины аз, шуңа ул биянеке кебек ачы түгел. Табиблар кымызны дәвалану максатында аз күләмдә стакан-стакан ярым гына эчәргә киңәш итәләр. 

Кымызны өйдә әзерләү өчен бия яки сыер сөте дә кирәк түгел хәтта!

Бер литр кефирга яки оеган, ачыган сөткә 1 стакан кайнаган җылымса су, ике аш кашыгы бал, булмаса шул ук күләмдә шикәр комы кушасың. Шунда ук алдан баллы суда 2 сәгать күпертелгән (2-3 г кипкән яисә 3-5 г ачы) чүпрә кушасың да, барысын бергә бутап шешәләргә тутырасың. Шешәнең борып ябыла торган капкачлысы яхшы. Эчемлек бер сәгатьләп вакыт үткәч, кайный, күперә башлый, күбекләнә. Шуннан соң шешәләрне 10-12 градуслы салкын суда 2-3 көн тотасың. Ачар алдыннан салкын урында тотарга кирәк. Шуннан соң тәмен татып карасаң да була.