Көзге моңнар

Көзләр килде туган якларыма,

Берчә ямьле, берчә ямансу.

Гомер көзем көчәйтә хисләрне,

Шуңадыр да аз гына моңсу.

Көзге урман. Купшы агачлары

Төрле төстә күлмәк кигәннәр:

Чагу кызыл, уттай сары, яшел.

Күкләр, күлләр  ачык зәңгәрләр.

Төрле-төрле төстәге агачлар

Бер рәткә тезелеп килгәннәр

Зур бәйрәмгә, озатырга җәйне,

Иңнәренә шәлләр салганнар.

Әфлисун төсле чагу яфраклар

Күбәләктәй оча, коела.

Җир өстендә кызгылт-сары келәм –

Шундый матур булып тоела.

Аяз күккә карыйм: казлар оча,

Каңгылдашып җылы якларга.

Ятимләнеп кала елга-күлләр,

Язга тикле ямансуларга.

Басулар да күптән бушап калды,

Мул уңышлар җыеп алынды.

Эскертләрне хәзер өймиләр,

Төргәкләргә салам төренде.

Мәктәпләрдә кызу эш башланды,

Кыңгыраулар чыңлап торалар.

Мәктәбемне искә төшерәләр

Чыр-чу килгән бала-чагалар.