Авылда гәзитсез булмый

Атна саен бүләк уйнатканда Альмира Улямаева аш тәлинкәләре отты. Үзе әйтүенчә, күңелле сөенче турында аңа беренче булып ахирәте хәбәр иткән.

– Авылда район гәзитеннән башка буламыни? Аңа мотлак язылабыз. Башта тормыш иптәшем укып чыга, аннан ашыкмыйча гына үзем укыйм. Соңгы биттән башлыйм, берәр танышымны юбилее белән котласалар, шатланам, кара рамга куелган таныш исем-фамилияне күрсәм, якыннарының кайгысын уртаклашам, – диде Альмира Фәрит кызы. – Улыбыз Азатның гаиләсе белән бергә яшибез, күпләп мал-туар, кош-корт асрыйбыз, яшелчә-җимеш үстерәбез, дип сөйләде ул.