Чишмәлеләр телефон аферистлары аркасында зыян күрде

Алдау түбәндәге рәвештә башкарыла: зыян күрүченең телефонына «Саклык банкы» хезмәткәре исеменнән шалтыраталар. Шалтыратучы сезнең банк картасыннан интернет-кибеткә 4 900 сумлык товарга түләнгән, дип хәбәр итә.

Сатып алуны гамәлдән чыгару һәм акчаны кире кайтару өчен банк картасы мәгълүматларын сорый. Хатын аңа ышанып, мәгълүматларны әйтә һәм акчасыннан колак кага.

Гыйнвар урталарында Чишмәдә яшәүче бер кызны да шул рәвешле алдаганнар. Аңа «банк хезмәткәре» картадагы акчаңны алалар, саклык чарасы күрү өчен аны тиз арада яңартырга кирәк, дип хәбәр итә. Кыз «Дуслык» сәүдә үзәгендә «Саклык банкы» банкоматы ярдәмендә кредит картасыннан 27 000 сум алган (банк комиссиясе 810 сум күләмендә), аннары шул акчаны «Яндекс. деньги» кушымтасы аша мошенник күрсәткән исәпкә салган.

Алда язып үтелгән ике очрак буенча да җинаять эше кузгатылды һәм тикшерү бара.

Уяу булыгыз! Беркайчан да телефон аша шалтыраткан «банк хезмәткәрләренә» шәхси мәгълүматларыгызны җиткермәгез. Шикләнү туса, банкның «кызу линиясе»нә шалтыратып белешегез.

Фото: https://yurlitsa.ru/vernut-dengi-broker-obman-brokerami-chto-mozhno-sdelat/