Павел Баев: Иң мөһиме җиңү түгел

«Атлант» һәвәскәрләр футбол клубына чагыштырмача күптән түгел нигез салынган.

– Башта дуслар белән Уфада яки Чишмәдә булган спорт бәйрәмнәрендә катнаштык, бервакыт үз клубыбызны булдыру идеясе туды. Аны бөтен команда хуплады, һәм менә 2019 елда «Атлант»ка нигез салынды, – дип сөйләде «Атлант» сакчысы Павел Баев.

Аларның клубында 18 кеше бар. Клубның иң яшь әгъзасы Эльвир Фәхретдиновка – 17 яшь, ә иң өлкән уенчы Тимур Зариповка 34 яшь тулган.

– Командабыз бик максатчан һәм ныклы, ә безнең принцип җиңүгә омтылу гына түгел, иң мөһиме – уеннан ләззәт алу. Атнага берничә тапкыр шөгыльләнәбез, команданың барлык әгъзалары да эшләгәнгә күрә, нигездә, кичләрен җыелабыз. Ярышларда катнашу өчен экипировка алдык, – дип билгеләп үтте ул.

Сүз уңаеннан, команда өченче мизгел инде Уфада узган ярышларда катнаша. Шунысын да билгеләп үтәргә кирәк, кече футбол буенча төнге лиганың соңгы чемпионатында ул өченче урын алды. Район ярышларында да берничә тапкыр бронза һәм көмеш призер булды.

– Әлеге вакытта без төбәк башкаласында узган чемпионатта катнашабыз. Безнең дә, һәр команданыкы кебек, үз традициябез бар. Уфаның һәвәскәрләр лигасында (ФУЛЛ) җиңүгә өмет итәбез, – дип фикерләре белән уртаклашты Павел Александрович.