Кадетлар сыйныфы: киләчәккә беренче адым

Өлкән буын өчен бу күренеш таныш тарихның яңгырашы кебек тоелырга мөмкин: элеккеге балаларның форма киеп, тәртипле булырга тырышып, ил сакчысы булырга хыялланган чакларын искә төшерегез әле. Тик хәзерге кадет сыйныфларында романтика гына түгел, төгәл максат та бар: яшүсмер җиденче сыйныфтан ук тикшерү органнарындагы хезмәт белән таныша һәм бу һөнәрнең аңа туры килү-килмәвен аңлый ала.

Бүгенге көндә Уфада –  җиде, Уфа районында – ике, ә Чишмәдә бер кадетлар сыйныфы ачыла. Мәктәп директоры Эльвира Аблеева әйтүенчә, коллектив бу яңалык белән горурлана. «Безнең максат – балаларга таяныч булу һәм аларның киләчәк юлын ачыкларга ярдәм итү», ди ул.

Кадет формасы – ул бары тик тышкы кыяфәт кенә түгел, ә дисциплинаның бер өлеше. Ул укучыга җаваплылык турында искәртә. Уку программасы да үзенчәлекле: «Рәсәй Федерациясе Тикшерү комитетында дәүләт хезмәте нигезләре» һәм «Тикшерүче һөнәренә кереш» кебек өстәмә дәресләр кертелгән. Моннан тыш, хокук, тарих, җәмгыять белеме кебек фәннәр тирәнтен өйрәнеләчәк  бу киләчәктә ведомство югары уку йортларына укырга керергә теләүчеләр өчен зур өстенлек булачак.

Тикшерү комитеты хезмәткәрләре мәктәпкә даими килеп, укучылар белән очрашачак, уртак дәресләр үткәрәчәк. Чишмә районара тикшерү бүлеге җитәкчесе, юстиция капитаны Руслан Ергизов ассызыклаганча, төп бурыч – балалардан тиз арада «тикшерүче ясау» түгел, ә һөнәрнең катлаулыкларын һәм җаваплылыгын күрсәтү. Сафта йөрү, спорт, команда белән эшләү – болар барысы да теләсә кайсы өлкәдә кирәк булачак мөһим күнекмәләр.

Эльвира Дамир кызы билгеләп үткәнчә, профильле уку йортлары белән килешүләр төзү укучыларга гамәли тәҗрибә тупларга ярдәм итәчәк. Бу – гарантияле эш урынын вәгъдә итү түгел, ә һөнәр сайлауда җитди ярдәм. Әлеге проект Рәсәй Тикшерү комитетының 2025–2030 елларга профильле кадетлар белемен үстерү концепциясенә нигезләнгән.

 Җиденче сыйныф укучылары өчен форма киеп, сафта басып тору әлегә бераз гадәти түгел кебек. Ләкин нәкъ менә шушы яшьтә алар үзләренә булган ышанычны тоярга тиеш. Бәлки, кемдер соңрак бу һөнәрнең үзенеке түгеллеген аңлар, ә кемдер, киресенчә, гомерен шушы эшкә багышлар. Ничек кенә булмасын, бу – алар өчен зур тормыш мәктәбе.