Җиңү тавышлары: ветераннар безнең йөрәкләрдә

Башкортстан Башлыгының грантлар бәйгесендә җиңүе һәм китапханәчеләр, волонтерлар, укучыларның хезмәте нәтиҗәсендә аларның батырлык тарихы киләчәк буыннар өчен сакланып кала. Игътибар үзәгендә – 100 яшьлек сугыш ветераны Солтан Хәйдәров һәм тагын 14 каһарман. Хәзер аларның тавышлары район мәктәпләрендә үткән дәресләрдә һәм очрашуларда яңгыраячак, ә йомгаклау презентациясе җиңү истәлеген хөрмәт итүчеләрне берләштерәчәк.

Мәдәни-агарту киңлеген булдыруга һәм Бөек Ватан сугышында катнашучыларның батырлыкларын мәңгеләштерүгә юнәлтелгән бу инициатива район тормышында әһәмиятле вакыйга булды.

Проектны Чишмә районы хакимияте ярдәме белән китапханәчеләр һәм волонтерлар командасы тормышка ашырды. Баштан ук зур күләмле эш алып барылды: китапханә хезмәткәрләре архивларны өйрәнде, сугышта катнашучыларның туганнары белән аралашты, сценарийлар өчен материаллар җыйды. Бу мөһим эшкә гимназиянең 5-8 сыйныф укучылары һәм беренче мәктәп укучылары да җәлеп ителде. Балалар сугышчыларның гаиләләрен эзләүдә булышып кына калмадылар, ә мөстәкыйль рәвештә интервьюлар алып, Җиңү яулаучыларның оныклары белән аралаштылар.

Фильмны төшерү Бәкәй авылыннан бердәнбер исән калган Бөек Ватан сугышы ветераны, кырыс сугыш сынауларын үткән, 2025 елда 100 яше тулган Солтан Хәмәтгали улы Хәйдәров белән интервью яздырудан башланды.

Проект буенча һәрберсе 5-20 минут дәвам иткән 15 документаль видеоязма төшерелде.

Фильм каһарманнары – 15 кеше: Әсхәт Байбурин, Владимир Балихин, Солтан Богданов, Корбанга-ли Вәликәев, Фәйзрахман Гаймалетдинов, Нигьмәт Гарифуллин, Николай Гусаков, Николай Гуслистый, Шәфәгать Карачурин, Тәлгать Нугаев, Рәхмәтулла Фәйзуллин, Солтан Хәйдәров (ветеран үзе катнашты – татар телендә сөйли), Раушан Хәйдәров (әтисе Солтан Хәйдәров турында рус телендә сөйләде), Хәлил Йосыпов, Андрей Козловский. Аларның язмышлары турындагы тарих киләчәк буыннар өчен мәңге сакланыр.

Проектны сыйфатлы итеп тормышка ашыру өчен профессиональ җиһазлар: камера, микрофоннар, ноутбуклар һәм софтбокс сатып алынды.

Фотога төшерү һәм монтажлау өчен төп мәйданчык район китапханәсе булды. Видеопортретлар белән «ВКонтакте» төркемендә «Чишмә китапханә җәмгыяте» оешмасы сәхифәсендә танышырга мөмкин.

Проект йомгаклары буенча, әзер булган барлык видеоматериаллар район мәгариф идарәсенә тапшырылды, аларны мәктәпләрдә кулланырга мөмкин булачак. Хәзер «Мөһим нәрсәләр турында сөйләшүләр» дәресендә һәм сыйныфтан тыш чараларда Чишмә районы укучылары геройларның хатирәләре белән таныша алачак. Якын арада проектка йомгак ясала, булдырылган барлык материаллар киң аудиториягә тәкъдим ителәчәк.

Бу мөһим эшне оештыручылар яшь буынны патриотик тәрбияләү һәм Бөек Ватан сугышы геройлары турындагы хакыйкый хәтерне саклау өчен башкарылган эшнең мөһимлеген ассызыклый. «Җиңү авазлары» проекты ветераннар турындагы истәлекне саклап калырга гына түгел, ә тарихи хәтерне киләчәк буыннарга тапшырырга ярдәм итте, илебезнең җиңү хакына түләгән югары бәясен тагын бер кат искә төшерде.

Елизавета Гәрәева, район китапханәсенең өлкән методисты.