Киез басу осталыгы буыннан буынга күчә

Евразия күчмә цивилизацияләр музееның Визит-үзәгендә киездән панно ясый башладылар.

«Турахан» симпозиумында һәм осталык дәресләрендә Рәсәй төбәкләреннән, шулай ук Әзәрбайҗан, Иран, Казахстан, Кыргызстан, Монголия, Таҗикстан һәм Үзбәкстаннан килгән вәкилләр катнашты.

Бу проектның гамәлгә ашырылуына икенче ел. Рәссамнар һәм кунакларның кул эшләре хәзер «Шүлгән-Таш» музей комплексында саклана. Чишмә панносы да вакытлыча саклау өчен шунда озатылачак, ә Евразия күчмә цивилизацияләр музее төзелеше тәмамлангач, кире Визит-үзәккә кайтарылачак.

Киез басып панно ясау осталыгы белән Уфадан килгән педагог, җәмәгать эшлеклесе Ләйсән Гыйльманова таныштырды:

– Бездә өлкәннәр һәм биш яшьтән башлап балалар өчен фольклориадалар уздыру тәҗрибәсе бар. Киез басу бәйгеләрендә һәркем теләп катнаша. Тиздән үтәчәк фестивальдә осталык класслары, мастер-шоулар, лекцияләр, очрашулар, төрле квестлар булачак. Быел 30дан артык чара оештырыла, аларга Рәсәй төбәкләре дә кушылачак. Анда быелгы симпозиум да керә, арытаба күргәзмәләрдә катнашу өчен арт-объектлар булдырачакбыз. Шулай ук Рәсәйдә Гаилә елына багышланган «Киезфест» III республика киез басу фестиваленең бәйге-күргәзмәсендә катнашучылар да сайлап алынды. 727 катнашучы игълан ителде, алар арасында 400дән артык кеше катнашлыгында басылган бер зур киез келәм дә бар. Нәтиҗәдә, фестивальдә 589 оста катнашачак, – дип хәбәр итте Ләйсән. – Мин һәр өйдә тач, уклау һәм сабын бар, йон табасы гына кала һәм киез басуда катнашып, үзеңне сынап карарга мөмкин, дип әйтәм. Инструментларны масмаркетлардан алырга була. Безнең шөгылебез, кешеләрнең төп шөгыле нинди булуга карамастан, укучы балалар һәм өлкәннәр арасында да зур кызыксыну уята.

«Киезфест» фестивале проекты мәдәният, сәнгать, креатив индустрияләр өлкәсендәге проектлар арасында Мәдәни инициативалар буенча Президент фондының 2024 елгы II грант конкурсында, шулай ук милли мөнәсәбәтләр өлкәсендәге иң яхшы тәҗрибәләрнең VI Бөтенрәсәй бәйгесендә һәм «Милли мөнәсәбәтләр өлкәсендәге ресурс үзәк» җәмгыяте һәм Президент грантлары фонды һәм Милләтләр эшләре буенча федераль агентлык ярдәмендә милләтара, динара мөнәсәбәтләр һәм миграция буенча Рәсәй Иҗтимагый палатасы комиссиясе тарафыннан үткәрелгән бәйгедә җиңү яулады.

Шулай итеп, киез басу осталыгы һәм борынгы гореф-гадәтләр республика Башлыгы ярдәме белән актив рәвештә яңадан торгызыла, яңа идеяләр белән үсеп килүче буынга тапшырыла. Милли киемнәр киеп йөрүчеләр әлегә булмаса да, киез сумкалар, уенчыклар һәм башка әйберләрне көндәлек тормышта бик теләп кулланучылар бар.