Тар белгечлекләргә кытлыкны бетерү: яңа инициативалар һәм уңышлы карарлар

Рәсүлҗан Нәсим улы сөйләвенчә, ул Башкорт дәүләт медицина университетының бишенче курсында белем алганда ук Чишмәгә эшкә килергә карар иткән, безнең район аны Уфага якынлыгы белән җәлеп иткән, шул ук вакытта дәваханә җитәкчелегенең мөнәсәбәте дә хәлиткеч роль уйнаган.

– Мин тумышым белән Таҗикстаннан. 26 яшьтәмен. Гаиләм бар, тормыш иптәшем белән алты айлык кызыбыз Сафияне тәрбиялибез. Арендага фатир алып торабыз, түләүне Чишмә үзәк район хастаханәсе компенсацияли. Бар игътибарыбызны һәм көчебезне пациентларга, авыруларны ачыклауга юнәлтә алсын өчен безгә, яшь белгечләргә карата җитди мөнәсәбәттә булулары, торак-көнкүрештәге проблемаларны хәл итүдә ярдәм күрсәтүләре мөһим. Медицина буенча стажым нибары биш ел булса да, берникадәр тәҗрибәм бар дип әйтә алам. «Covid-19» пандемиясе башланган елны Уфаның 8-нче дәваханәсендә реанимация бүлегендә медбрат вазифасында эшли башладым. Университетның бишенче курсында онколог булырга карар иттем. Һәм моңа бер тапкыр да үкенмәдем.

Табиб булу армый-талмый эшләүне һәм фидакарьлек таләп итә. Ул көн саен яңа сынаулар белән очраша, гамәлдә куллану өчен медицина фәненең соңгы казанышларын өйрәнә. Яшь онколог үз эшенең авыруларны дәвалау белән генә чикләнмәвен, авыр вакытларда пациентларга һәм аларның гаиләләренә дә ярдәм кирәклеген аңлый.

Әйтергә кирәк, район дәханәсендә җиһазлар һәрвакыт яңарылып тора, медицина хезмәтләренең сыйфатын яхшырту өчен заманча технологияләр кулланыла. Күптән түгел электрокоагулятор сатып алынган, ул тиредәге шешләрне бетерергә мөмкинлек бирәчәк, бу, үз чиратында, пациентларны диагностикалау һәм дәвалау сыйфатын арттырачак. Бу учреждениенең медицина ярдәме шартларын яхшыртырга һәм район халкының сәламәтлеге турында хәстәрлек күрергә омтылуын күрсәтә. Яңа технологияләр кертү шулай ук белгечләр җәлеп итәргә һәм пациентларның ышанычын арттырырга да мөмкинлек бирә.