Онколог та, травматолог та

– Бөтен бәла шунда, кешеләр ел саен үтелергә тиешле диспансерлаштыруга артык әһәмият бирмиләр, моны вакытны әрәм итү дип саныйлар, тикшерү үтсәләр дә, нәтиҗәләре белән кызыксынмыйлар. Һәркайсыбыз сәламәтлеген үзе кайгыртырга тиеш. Авыру башлангыч стадиядә ачыкланса, хроник чир яки яман шеш булсынмы ул, профилактика белән шөгыльләнергә, чирнең азуын көтмичә дәвалана башларга кирәк, – ди ул.

Баш табиб Урал Шәрипов сөйләвенчә, үзәк район дәваханәсе идарәлеге халыкның сәламәтлеген саклау һәм ныгыту буенча даими эш алып бара. Башкортстан Башлыгы һәм республиканың сәла-мәтлек саклау министры Айрат Рәхмәтуллин булышлыгында федераль һәм төбәк программалары буенча заманча медицина җиһазлары сатып алына, колледжлар һәм университетлар белән турыдан-туры эш алып барыла, аларны тәмамлаучылар белән очрашулар оештырыла, шул исәптән «Земство докторы» һәм «Земство фельдшеры» программалары буенча белгечләр җәлеп ителә.

Быел Чишмә үзәк район дәваханәсе максатлы юллама буенча белем алган травматолог Ильвир Измәгыйловка һәм табиб-педиатр Руслан Мусинга компенсацион түләү юллау өчен республиканың Сәламәтлек саклау министрлыгына документлар җибәргән. Алар тиешле еллар эшләгәннән соң, «Земство докторы» программасында катнашачак.

Тагын бер табиб – балалар хирургы Роберт Зәйнуллин безнең районга Уфа шәһәреннән күчеп килгән.

2024 елда үзәк район дәва-ханәсе шулай ук табиб-хирург Равил Шәяхмәтовны һәм табиб-онколог Рәсүлҗан Нарматовны да әлеге программада катнаштыру өчен гариза җибәрәчәк.