Тормыш чыганагы – иҗат

Район мәдәният сараенда «Мин яратам сине, тормыш!» дип аталган өлкән буын кешеләр иҗаты республика фестиваленең төбәк этабы узды.

Кушнарен, Нуриман, Благовещен, Мишкә, Кырмыскалы, Бөре районнарыннан бик күп катнашучылар килде. Фестивальдә безнең коллективлар да чыгыш ясады, Гала-концерт Уфа шәһәрендә узачак.

Кунакларны район хакимияте башлыгы Ришат Мансуров үзе сәламләде.

Жюри составында фестиваль координаторы Эвелина Горбенко, Башкортстан Республикасы Хезмәт министрлыгының әйдәп баручы белгеч-эксперты, халык уен кораллары милли оркестрын оештыручы Рамил Гайзуллин, сугыш, хезмәт, Кораллы көчләр һәм хокук саклау органнары ветераннарының Башкортстан Республикасы буенча иҗтимагый оешмасы рәисе урынбасары Рәйханә Абдулхаева, Башкортстанның атказанган мәдәният хезмәткәре Лилия Иванова һәм республиканың халык артисты Әлфия Юлчурина бар иде, шулай ук җырчы, Рәсәй Федерациясенең атказанган артисты, Башкортстанның халык артисты Нәзифә Кадыйрова булды, ул микрофонсыз чыгыш ясап (куелган тавышы моңа мөмкинлек бирә), зур тәэсир калдырды. Ул иҗади шәхесләр, бигрәк тә актив булган, өйдә генә ятмаган, иҗтимагый тормышта катнашкан кешеләр белән чын күңелдән горурлануын һәм соклануын белдерде. «Шулай кирәк, өйдә ни эшлисең инде!? Ә монда сез сәхнәдә, барысы да сезне алкышлыйлар, афәрин», – диде ул.

Өлкән буынның чыгышын күңел биреп, ихлас башкарулары берләштерә. Җыр, бию яки шигырь булсынмы, һәр чыгыш күңел җылысы белән сугарылган.

Шөнгәккүл авылыннан «Рябинушка» коллективында катнашучы Любовь Шимко тормыш сөюнең ачык мисалы булып тора. Ул гомерен балалар укытуга багышлаган, берничә ел авыл мәктәбе директоры вазифасын башкарган, лаеклы ялга чыкканнан соң да актив яшәү рәвешен дәвам иткән. Шөнгәккүл мәктәбендә һәм мәдәният йортында еш кунак. Ул чын мәгънәсендә дәртле һәм тормыш сөючән кеше, элек тә һәм хәзер дә яшь буын өчен үрнәк булып тора.

Сүз уңаеннан, фестивальгә аларның Благовещен районыннан адашлары – «Рябинушка» коллективы килде. Алар райондашларының «Дөньяда башка Башкортстан юк» шигыренә язылган ватанпәрвәрлек рухындагы җырын башкардылар.