Сәләтләре сәхнәдә ачыла

– Барлык чаралар район мәдәният сарае һәм авыл мәдәният йортлары хезмәткәрләре катнашлыгында уза, – ди Эльвира Нәҗип кызы. – Безнең артистлар югары һөнәри һәм башкару осталыкларын күрсәтеп, республика күләмендә үткән төрле конкурсларда һәм чараларда актив катнашалар. Күрше районнарга гастрольләргә чыгалар.

Һөнәри бәйрәмнәре алдыннан мәдәният хезмәткәрләренең районда үтәчәк чаралар планын төзүен күрдек. Залны бизәү, концерт номерлары әзерләү, төрле мәйданчыкларда репетицияләр ясау турында фикер алыштылар.

Без барганда «Ак чишмә» бию коллективы репетиция ясый, «Синяя птица» театр коллективы А. С. Пушкинның «Моцарт һәм Сальери» пьесасы буенча спектакльдән күренешләрне кабатлый, ә мәгълүмат-аналитика бүлеге методистлары реклама рольләрен планлаштыра иде.

– Безнең коллективта сәхнә артистлары гына түгел, хезмәтләндерүче персонал, гардероб хезмәткәрләре һәм сәхнәне яктыртучылар да зур эш башкара. Эшләре мәдәният һәм сәхнәдә чыгыш ясау белән бәйле булган хезмәткәрләрнең барысын да чын күңелдән һөнәри бәйрәмебез белән котлыйм, барысына да ныклы сәламәтлек, бәхет һәм иҗади уңышлар телим, – дип билгеләп үтте Эльвира Яхина.