Санжаровкада казак җырлары яңгырый

Узган елның июнендә ул Октябрьский шәһәрендә VII төбәкара казак мәдәнияте фестиваль-бәйгесендә катнашып, «Вокал ансамбльләр» номинациясендә өченче урын алды һәм диплом белән бүләкләнде.

– Фестиваль-бәйгедә катнашу бик булышты, Казак мәдәнияте үзәге укытучылары һәм хезмәткәрләре безнең өчен осталык класслары үткәрделәр, борынгы йолаларны күрсәттеләр. Казак җырларыннан торган репертуарыбызны интернет аша сайлыйбыз, сәхнә мәдәниятенә өйрәнәбез, – ди коллектив җитәкчесе Оксана Лысенко.

«Зимняя вишня» ансамблендә сигез кеше – ике ир-ат һәм алты хатын-кыз катнаша. Атнага ике тапкыр репетиция үтә. 2022 елда тагын «Яңа исемнәр» конкурсында катнашу өчен гариза биргәннәр. Коллектив һәм клуб белән 2003 елдан бирле Оксана Васильевна җитәкчелек итә. Ә моңа кадәр ул Санжаровка мәктәбендә укытучы булып та эшләгән. Үз эшен бик яратып, күңел биреп башкара. Клубта «Росинка» балалар фольклор коллективы да шөгыльләнүен әйтеп китик. Сәхнә костюмнарын хатын-кызлар үзләре тегәләр.

– Кыенлыклар да бар – клубта микрофон юк. Үзебездә чыгыш ясаганда аның булмавы сизелми – ансамбльдә катнашучыларның тавышы көчле, клуб та зур түгел, залда акустика яхшы. Ә башка урыннарга барып чыгыш ясаганда кыен, –диде Оксана Васильевна.

Коллективның казанышлары да бар инде – ул «Җырлаучы авыл-2021» Республика конкурсының II дәрәҗә дипломына, районнар арасында үткән «Яңа исемнәр-2021» интернет-бәйгесенең «Вокал коллективлар» номинациясендә I дәрәҗә дипломга лаек булды. Бу исемнәр ансамбль әгъзаларының югары һөнәрилеген раслый, әмма иң мөһиме – авыл һәм район халкының яратып, алкышлап каршы алуы, тамашачыларның «Зимняя вишня» коллективы чыгышын һәр чарада көтеп алуы.