Инициативалар хупланган очракта...

Конкурста бөтен Башкортстаннан барлыгы 153 проект катнашты, шуларның 58е хуплау тапты. Чишмәлеләр откан грантлар күләме 3 миллион сумнан артып китте. Элегрәк алынган акчаларны (4,2 миллион сум) исәпкә алганда, 2026 елда районга җәлеп ителгән акчаларның гомуми суммасы 7,2 миллион сумнан артты.

Хәзер районда нәрсәләр барлыкка киләчәк?

Сигез проектның һәркайсы үзенең мөһим бурычын хәл итә, һәм һәр җирдә диярлек балалар һәм волонтерлар төп роль уйный.

Дурас авылы биләмәсендәге «Хәсән» волонтерлык штабы яугирләргә дроннан саклану өчен юрганнар тегү белән шөгыльләнәчәк. Бу – җирле инициативаларның хәзерге вакытта сугышчыларга турыдан-туры ярдәм итүенең бер мисалы. Штаб җитәкчесе Айгөл Кәримова сүзләренә караганда, грант буенча бүлеп бирелгән акчага профессиональ сәнәгать җиһазлары һәм кирәкле материаллар сатып алу планлаштырыла. Дроннан саклану өчен юрганнар әзер калып буенча тегелә, бу эштә техниканы һәм позицияләрне тепловизорлардан яшерә торган заманча материаллар кулланыла. Әзер әйберләрне турыдан-туры алгы сызыкка озатырга ниятлиләр – бу хәрби хезмәткәрләр өчен хәвефне киметергә һәм техниканың сакланышын арттырырга мөмкинлек бирәчәк.

Чишмә авыл Советында Ильяс Әсәдуллин исемендәге волонтерлык штабы белән тыгыз хезмәттәшлектә коммерцияле булмаган «Родник» оешмасы ачылган. Монда балаларның ватанпәрвәрлек рухындагы волонтерлык хәрәкәтенә басым ясала: алар хәрби госпитальләр өчен марлядан бәйләвечләр тегәчәк, коткару браслетлары һәм башка кирәкле әйберләр ясаячак. Штаб җитәкчесе Назгөл Михайлова сөйләвенчә, балаларны мондый эшләргә җәлеп итү тормышка карата җаваплы караш тәрбияләргә һәм хәтта кечкенә өлешнең дә чын ярдәм булуын аңларга ярдәм итә.

Ибраһим авыл Советының коммерцияле булмаган оешмасы ирекле янгын сүндерү командасын ныгыта. Грант акчасына авыллар тирәсен янгыннан саклау максатында сөрү өчен сабан сатып алыначак. Моннан тыш, команданы җитешмәгән җиһазлар белән тулыландырачаклар. Зур булмаган авыллар өчен мондый ярдәм – бөтен территориянең иминлеге мәсьәләсе.

 «Солнышко» балалар бакчасы базасында гамәлгә ашырылучы «Яшь янгын сүндерүче» проекты хәвефсезлеккә басым ясый: биредә кечкенә балаларга хәтердә һәм рефлексларда калырлык итеп янгыннан саклану кагыйдәләрен өйрәтәчәкләр. Моның өчен җиһазлар – төтен пушкалары, ут имитациясе сатып алыначак һәм эвакуацияләү сценарийлары эшләнәчәк. Балалар янгын чыкканда нәрсә эшләргә кирәклеген өйрәнәчәк һәм катлаулы хәлдә югалып калмаячак.

Шөнгәккүл авылы мәктәбендә «Голос поколений» медиастудиясе ачылачак. Аның үзенчәлеге шунда, балалар бу авыл биләмәсендә яшәгән Бөек Ватан сугышында катнашучылар турындагы истәлекләр төшерергә, хатирәләр тупларга, аларны монтажларга һәм цифрлаштырырга өйрәнәчәкләр. Бу хатирәләрне киләчәк буыннарга саклауның заманча ысулы.

Район телевидениесендә «Чишмә районының мәдәни коды» атамасындагы балалар телевидениесе студиясе барлыкка киләчәк. Анда катнашучылар безнең районда яшәүче төрле милләтләр турында фильмнар төшерәчәкләр. Планда – көнкүреш, милли ризыклар, кием-салым, телләр турында сөйләү. Моның өчен балалар остазлары белән авылларга чыгачак, өлкәннәр белән аралашачак, интервьюлар яздырачак.

«РОСТ» автоном коммерциягә карамаган оешманың «ПРОдвижение» проекты шулай ук Башкортстан Республикасы Башлыгы грантларының икенче конкурсында җиңүче булды. Аның төп максаты – Чишмә районы укучыларында фән һәм техника белән кызыксыну уяту. Балалар, технологияләр белән беренче танышудан башлап үз проектын эшләүгә кадәр, үзләрен яшь тикшеренүчеләр һәм инженерлар ролендә сынап карый алачак.

Шулай ук «Башкортстан Республикасы Ватан сугышчылары гаиләләре комитеты» коммерциягә карамаган оешманың «Волонтерның күзләренә карагыз» атамасындагы фотопроекты белән җиңү яулады, ул илнең «күренми торган фронты»н тәшкил итүче кешеләрнең йөзләрен күрсәтергә тиеш.