«Мәктәпкә җыенырга ярдәм ит» акциясе дәвам итә

Рюкзаклар, канцелярия товарлары, мәктәп формасы – 1 сентябрьне бәйрәмгә әйләндерәчәк барлык әйберләрне Чишмә районындагы «Гаилә» үзәгенә китерергә мөмкин (адресы: Чишмә пос., Киров урамы, 19. Телефон: 8 (34797) 2-26-55). Кемдер ел саен ярдәм итәргә тырыша: алар инде бу акцияне оештыручылар өчен туганнар кебек якын. Ә кемдер беренче тапкыр килә – бу да бик мөһим, чөнки игелекле кешеләрнең артуы ярдәмгә мохтаҗ гаиләләрне ялгыз калдырмаска мөмкинлек бирә. Берәүләр дәфтәрләр алып килә, икенчеләре тулы комплектлар туплый, ә кемдер, исемен дә әйтмичә, тартмасы белән калдырып китә.

«Гаилә» үзәге җитәкчесе Дарья Зарипова билгеләп үтүенчә, бу эштә иң мөһиме – мактану түгел, ә чын күңелдән ярдәм итү теләге.

Мәктәп кирәк-яракларын кабул итү пунктлары республиканың барлык «Гаилә» үзәкләрендә эшли. Җыелган әйберләр күп балалы һәм аз керемле гаиләләргә, инвалид балаларга, шулай ук махсус хәрби операциядә катнашучыларның балаларына тапшырыла.

Республика буенча саннар үзләре үк сөйли: узган ел уртак көч белән 10 меңнән артык бала ярдәм алган, шул исәптән 1882 бала – хәрби операциядә катнашучылар гаиләләреннән. Һәр сан артында – балаларның шат елмаюы, тулы рюкзагы һәм киләчәккә булган ышанычы ята.

Беренче сентябрьгә кадәр бу изге эштә катнашырга вакыт бар әле. Дәфтәрләр, каләмнәр, ручкалар, портфельләр, кием-салым, мәктәп формалары, дәреслекләр яки әдәби китаплар алып килергә мөмкин. Әгәр ярдәм итүне ял көне белән берләштерәсе килсә, 29 августта узачак «Гаилә ялы» акциясенә кушылырга чакырабыз.

Балалы гаиләләргә ярдәм итү – «Гаилә» гомумдәүләт проектының төп юнәлешләренең берсе. Ләкин бу рәсми сүзләр артында гади кешеләрнең игелекле гамәлләре тора: беренче сыйныф укучысы өчен җыелган портфель, мәктәп кирәк-яраклары салынган пакет яки вакытында сузылган ярдәм кулы.

Ярдәм иткәннәргә дә, бу эштә беренче адым ясарга җыенучыларга да алдан ук зур рәхмәт әйтәсебез килә.