Киләчәк уңыш турында хәстәрлек күреп

Район хакимияте башлыгы Ришат Әнис улы Мансуров оператив киңәшмәдә билгеләп үтүенчә, һава торышының алмашынып торуы һәм көннәрнең кабаттан салкынайтуы эш барышына комачауламый.

Ул елның иң мөһим кампанияләренең берсенә җаваплы караулары өчен авыл хуҗалыгы хезмәткәрләренә рәхмәт белдерде һәм уңышлар теләде.

Барлык чаралар язгы кыр эшләрен вакытында һәм сыйфатлы үткәрүне тәэмин итүгә һәм киләчәк уңышка нигез салуга юнәлдерелгән.

Район хакимияте башлыгының беренче урынбасары, Авыл хуҗалыгы һәм азык-төлек идарәлеге начальнигы Эрнес Әлфир улы Кәримов эшләрнең хәтта катлаулы шартларда да график буенча баруын билгеләп үтте. 28 апрельгә алынган мәгълүматларга караганда, районда 1 397 гектарда сабан культуралары, шул исәптән  591 га – сабан бодае, 606 га – борчак, 200 гектарда көнбагыш чәчелгән. Атна башыннан шикәр чөгендере чәчүгә керешкәннәр. Эрнес Кәримов сүзләренә караганда, 6175 тонна минераль ашлама сатып алынган, бу тиешле күләмнең 90 проценты. 4800 тонна орлык агуланган, 23500 гектар мәйданда дым каплатылган һәм 4061 гектарда күпьеллык үләннәр чәчүлекләре тырматылган.  Үткән елда республикада авыл хуҗалыгына ярдәм итү өчен федераль бюджеттан 7,3 миллиард сумнан артык акча бүленгән. Шуның биш миллиарды турыдан-туры авыл хуҗалыкларына  техника, ашламалар, орлыклар сатып алуга, башка төрле ихтыяҗларга юнәлдерелгән.

Авыл хуҗалыгы тармагы үсешендә техник һәм технологик яктан яңалык кертү зур роль уйный. 2025 елда республика, шул исәптән Чишмә районы аграрийлары, тулаем алганда, 12 млрд сумнан артык югары җитештерүчәнлекле 2,2 мең берәмлек техника сатып алды. 2020 елдан башлап җәмгысе 79 млрд сумлык 20 мең берәмлек яңа техника һәм кораллар алынды.

Бу бер ашлык җыю комбайнына йөкләнешне 430 гектарга кадәр киметергә мөмкинлек бирә. Тармак хезмәткәрләре алдында 2030 елга бу күрсәткечне 350 гектарга кадәр җиткерү бурычы тора, бу урып-җыю эшләрен тагын да тизрәк һәм нәтиҗәлерәк башкарып чыгарга ярдәм итәчәк.

Башкортстан «Росагролизинг» машина-технология компаниясе (МТК) эше сыналган төбәкләрнең берсе булып тора. Республикага 60 берәмлек заманча авыл хуҗалыгы техникасы кайтарылды инде, ә 2026 ел ахырына МТК паркында 250 берәмлек техника булачак. Бу авыл хуҗалыгы эшчәннәренә югары технологияле хезмәтләрдән файдаланырга мөмкинлек бирәчәк, ә аларга киткән чыгымнарның бер өлеше – бәядән 30 процентка кадәре төбәк бюджетыннан компенсацияләнә. Шулай ук техника сатып алуны субсидияләү мөмкинлеге дә сакланып кала. БР Авыл хуҗалыгы министрлыгында хәбәр итүләренчә, техника рәсми сатучылардан (дилерлардан) сатып алына. Гарантия бирелә. Ягъни басуда эшләгәндә трактор яки комбайн ватылса, «Росагролизинг» машина-технология компаниясенең тәҗрибәле механиклары һәм слесарьлары эш тоткарланмасын өчен тиз арада ярдәмгә киләчәк. Моннан тыш, республика колледжлары һәм техникумнары белән килешүләр төзелә. Булачак механиклар һәм слесарьлар практикага чакырыла, алар басу шартларында эшләп карый алачак, ә аннары кулыннан эш килгәннәре «Росагролизинг» компаниясенә эшкә чакырылачак.