Уңышлар һәм сынаулар мизгеле

Хакимият башлыгының беренче урынбасары, авыл хуҗалыгы идарәлеге начальнигы Эрнес Кәримов билгеләп үтүенчә, хәзер җыелган уңышны саклап калу һәм аны урнаштыруны тәэмин итү өстенлекле бурычларның берсе булып тора.

2026 ел уңышы өчен көздән 10850 гектарда уҗым культуралары чәчеп калдырылган. Чәчү өчен хуҗалыкларның үз орлыгы да, райондагы туфрак-климат шартларына яраклаштырылган, мул уңыш бирә торган сортлы уҗым бодае да файдаланылган.

Техник культураларны урып-җыю кампаниясе дәвам итә. Алар якынча 24000 гектарда: көнбагыш – 8800 га, җитен – 989, соя 6600 гектарда суктырып алынырга тиеш. Җитен тулысынча алынып беткән: тулаем җыем – 1000 тоннага якын, уртача уңыш – гектарыннан 10 центнер. Көнбагыш 6200 гектардан 12000 тонна суктырып алынган, уртача уңыш куәте – 19,5 центнер.

Быел шикәр чөгендере дә бик мул: уртача уңыш – 483 центнер, шикәрлелек 17 процент тәшкил итә. Әлеге культура 6900 гектар мәйданда үстерелгән, 5500 гектары җыеп алынган, тулаем җыем 260000 тоннадан артып киткән.

«Башкир-Агроинвест» җәмгыяте аерым мактауга лаек: предприятие 1900 гектарда (планның 74%) уңыш җыйган, уртача уңыш – 545 центнер.

Чишмә шикәр заводы районның югары сәнәгать куәтен раслый: 9 октябрьгә биредә 237420 тонна чимал эшкәртелгән, тәүлек саен 5600 тонна шикәр чөгендере җитештерелә; хуҗалыклардан 13300 тонна татлы тамыр китерелгән.

Игенчеләр әледән үк язгы чәчүгә әзерлек эшләрен алып баралар: 27300 гектарда (планның 78 проценты) туңга җир сөрелгән. Район хуҗалыклары кышка тупас һәм сусыл мал азыгы белән тулысынча тәэмин ителгән – 15900 тонна силос әзерләнгән, бу план күрсәткечләреннән 13 процентка артык.

Шул ук вакытта 2025 елның 9-22 августында районда җитди агрометеорологик күренеш – туфракның артык дымлануы күзәтелә. Артык дым булу сәбәпле җир структурасы ябышкакка әйләнгән, бу үсемлекләрнең үсешен кыенлаштыра, шулай ук күп хуҗалыкларның уңышына йогынты ясый – югалтулар 15-35 процент тәшкил иткән. Белгечләр бәяләвенчә, явып үткән яңгырлар районның авыл хуҗалыгы җитештерүчеләре өчен җитди сынау булган.

Гомумән, һава торышы көйсезлекләренә карамастан, Чишмә районы быелгы сезонны уңай динамика белән тәмамлый. Якын киләчәктә хакимият һәм авыл хуҗалыгы эшчәннәре җыеп алынган уңышның сыйфатын саклауга һәм аны сатуны җайга салуга, шулай ук урып-җыю эшләрен төгәлләүгә һәм туфракны киләсе елга чәчүгә әзерләүгә игътибар юнәлтәчәкләр.

Фотода "Башкир-Агроинвест" җәмгыяте механизаторлары Равил Харисов һәм Алексей Елизарьев.