Төзеклек – хәвефсезлек нигез

Язгы кыр эшләре башланыр алдыннан районның барлык хуҗалыкларында диярлек авыл хуҗалыгы техникасын планлы тикшерүләр узды.

Поселок предприятиеләрендә дә техниканың төзеклеге тикшерелде. Хәзер шәхси файдаланудагы авыл хуҗалыгы техникасына чират җитте.

Шушы көннәрдә Караякуп авылы биләмәсендә яшәүчеләрнең техникасы тикшерелде.

Без килүгә авыл мәдәният йорты каршындагы мәйданда төрле модельле техника – «МТЗ», «ЮМЗ», «Владимировец» тракторлары тезелеп тора иде инде. Барысының да диярлек тагылмалары яки асылмалы җиһазлары – сабаннары, туфрак йомшартучы фрезалары, шулай ук КУН (төяү-бушату һәм җир казу өчен трактор транспортындагы фронталь гидравлик җиһазы) бар. Техника хуҗалары безне тыныч каршы алдылар, дулкынланулары һәм борчылулары сизелмәде. Алар үз машиналарының һәм агрегатларының төзеклеген төгәл белә. Чишмә районы буенча баш дәүләт инженерлык инспекторы Яков Кожевников тикшерә башлагач, бу сүзләрне раслап, техникаларын эшләтеп җибәрделәр, фараларының януын кабызып-сүндереп күрсәттеләр, тавыш сигналына бастылар. Һәр деталь инспекторның үткер күзе аша үтте, ул тормозларның төзеклеген, барлык машиналардагы руль рейкасы люфтын тикшерде.

Тикшерүгә куелган барлык техниканы карап чыкканнан соң, инспектор аларның төзеклеген ел саен тикшерү мөһимлеген, шунсыз үзйөрешле техниканы файдалану рөхсәт ителмәвен билгеләп үтте һәм трактор хуҗаларына әлеге чарага намуслы мөнәсәбәтләре өчен рәхмәт белдерде. Динар Ибраев, Хәниф Таһиров һәм Гизәр Зариповны аерым билгеләп үтте һәм тикшерүгә сыйфатлы әзерләнгәннәре өчен грамоталар белән бүләкләде.