Беренче булып чәчүгә төштеләр

Атна башында, көннәрнең язгыча бик үк җылы булмавына һәм салкынча җил исүенә карамастан, «Гыйлемханов Флюр Заһит улы» ШП фермер хуҗалыгы районда беренчеләрдән булып чәчүгә төште.

– 56 гектар мәйданда бодай чәчә башладык. Чәчүгә тотынганчы басуга минераль ашлама керттек, – ди фермер.

Без килеп җиткәндә тракторлар басуны бер тапкыр әйләнеп чыккан иде инде.

Ике агрегат эшли, чәчкеч тагылган «МТЗ-1221» тракторында механизатор Линар Мөбәширов утыра, аның артыннан икенче агрегат, Юлай Якупов идарә иткән катоклы «МТЗ-82» бара.

Фермерның улы Линар Гыйлемханов чәчкечкә басып күпме орлык төшүен игътибар белән карап бара. Шулай ук чәчкечкә ягулык салганда «ЗиЛ» йөк машинасы базасында корылган ашлык төягечкә идарә итә.

– Сөрүлек җирләрнең гомуми мәйданы 541 гектар тәшкил итә. Быел 200әр гектарда шикәр чөгендере һәм бодай, 68 гектарда арпа, 86 гектарда көнбагыш чәчәргә планлаштырдык, – ди Флюр Гыйлемханов.

Аның сүзләренә караганда, чәчүгә ныклап әзерләнгәннәр. Барлык техника ремонтланган, көйләнгән, механизмнар җайга салынган.

– Техника сынатмас, дип өметләнәбез. Ягулык-майлау материаллары җитәрлек күләмдә алынды. Бу яклап проблема юк, – дип сүзенә йомгак ясады ул.