Хезмәтенә күрә хөрмәте

Виктор Слепушкин беренче мәктәпнең унынчы сыйныфын тәмамлаганнан соң, 1978 елда районның авыл хуҗалыгы техникасы җәмгыятенә слесарь ярдәмчесе булып эшкә урнаша һәм өч айдан мотор-ремонт цехына слесарь вазифасына күчә. Совет Армиясе сафларында хезмәт итеп кайтканнан соң, 1981 елда янә бу предприятиедә эшләвен дәвам итә. Соңрак аны шоферлар курсларына укырга җибәрәләр, һәм ул 2008 елга кадәр шофер булып эшли. Аннары Виктор Слепушкин мотор цехына күчә. Цех начальнигы Рәлиф Хәсәнов сүзләренә караганда, ул барлык модификацияләрдәге «Т-150» һәм «К-700» тракторларының тапшырулар тартмасын ремонтлый белүче бердәнбер һөнәр иясе.

Наил Нигъмәтуллин хезмәт эшчәнлеген «Луч» колхозында комбайнчы ярдәмчесе булып башлый. Соңрак үзе комбайн штурвалы артына утыра, төрле маркалы тракторларда эшли. Хезмәт кенәгәсе 1977 елда ачылган. 2007 елда, колхозлар бетерелгәннән соң, «Башсельхозтехника»га ремонт цехына эшкә урнаша. Әлеге вакытта предприятиенең ремонт цехында 15 кеше эшли. Коллективта эретеп ябыштыручы, токарь, тимерче, детальләрне юучы бар. Наил Нигъмәтуллин үз эшен «энәсеннән җебенә кадәр белүче» тәҗрибәле осталар-ның берсе. Ул хезмәттәшләре белән иске генә тракторлардан өр-яңаны ясап куя, ди ремонт цехы начальнигы Ришат Мәсәлимов. Цехтан төрле модификацияле «МТЗ», «Т-150», «К-700» тракторлары, төрле чәчкечләр ремонтланып чыга.

Ике слесарь да күпьеллык намуслы хезмәтләре өчен барлык дәрәҗәдәге грамоталар белән бүләкләнгән. Предприятие, район хакимияте, республиканың Авыл хуҗалыгы министрлыгы тарафыннан тапшырылганнары да бар. Рәсәй Федерациясе Авыл хуҗалыгы министрлыгының Мактау грамотасы исә безнең мәкаләбез геройлары кебек хезмәт ияләренә иң югары хөрмәт билгесе булып тора.