Уҗым бодаен уру дәвам итә

Яңгырлар туктап, аяз көннәр башланды, игеннәр әкренләп өлгерә – аларны ура башлар вакыт җитте.

«Нерал-Чишмә» җәмгыятендә дә урып-җыю эшләре башланды.

Без килгәндә кырда 11 комбайн тезелеп тора, комбайнчылар төшке ашка тукталганнар иде. Баш агроном белән эшләр барышы турында сөйләшеп тордык.

– Уҗым бодаен ура башладык. Гомумән алганда, тугыз мең гектар мәйданнан бөртекле культуралар җыеп аласы бар. Ике төркемдә эшлибез. Чишмә районында – унбер, Уфада алты комбайн. Якты көндә 350-400 гектар җир урабыз, ике районга 600 гектардан суктырып алдык, бер комбайн көненә якынча 15-20 гектар мәйданда эшли. Алдан исәпләү буенча уҗым бодаеның уңышы һәр гектардан уртача 34 центнер тәшкил итә. Штурваллар артында көч-куәте ташып торган яшь комбайнчылар эшли, – диде Владимир Петрович.

Артур Шәфыйков, мәсәлән, бу хуҗалыкта икенче ел эшли.

– Армиядә чакта шалтыратып, комбайнны аңа калдыруыбызны сорады. Кайту белән икенче көнне үк эшкә чыкты. Урак чорында механизаторларга төш һәм кич ике тапкыр – 6да һәм 10да ашату оештырылган. Егетләр әлегә борчак уралар, ул башта бераз җилләргә тиеш, аннары суктырып алабыз, – ди баш агроном.