Балалар сәнгать мәктәбенә – 50!

Сәнгать мәктәбенең тарихы ерак 1972 елда башлана, райсовет башкарма комитеты карары белән Балалар музыка мәктәбенә нигез салына.

Беренче директор итеп Ринат Шәрәфетдинов билгеләнә, мәктәптә фортепиано һәм халык уен кораллары бүлекләре ачыла.

Ул вакытта музыка мәктәбендә 61 кеше белем ала. Беренче укытучылар – Владимир Гудных, Галина Кононец, Әсхәт Гомәров, Татьяна Новоспасская, Людмила Ульданова.

Дүрт елдан соң тынлы уен кораллары бүлеге ачыла. 1977 елда инде мәктәптә 18 укытучы эшли һәм 150 бала белем ала. Шул ук елда музыка теориясе бүлеге ачыла. Соңрак укытучылар сафларын Фуат Тимербаев, Виктор Касаткин, Варра Януров, Наталья Иванова тулыландыра.

Музыка мәктәбе тиз арада үсеш ала. 1979 елда Евгений Парафило җитәкчелегендә рус халык уен коралларында уйнаучы балалар оркестры оештырыла.

1980 елның июнендә Балалар музыка мәктәбе Чишмә сәнгать мәктәбе дип үзгәртелә, чөнки сәнгать бүлеге ачыла, анда укытучылар Татьяна Ванок, Рим Асаев, Зөфәр Гыйзетдинов һәм Нурия Лотфуллина белем бирә.

Яңа директор итеп Светлана Мамшева билгеләнә. 17 ел җитәкчелек итү дәверендә ул мәктәп үсешенә зур өлеш кертә.

1990 елда Чишмә сәнгать мәктәбенең яңа бинасы төзелә башлый, һәм 1992 елда файдалануга тапшырыла. Бүгенге көнгә кадәр бу диварларда укучыларның һәм укытучыларның талантлары ачыла.

1994 елда мәктәптә хореография (тәүге укытучыларның берсе – Әнфисә Сәйфетдинова), ә 2000 елда гомуми эстетик тәрбия бүлекләре ачыла.

Арытаба мәктәп директоры вазифаларын бер-бер артлы Халисә Зәбирова һәм Ольга Мартыненко алыштыра.

2010 елда Чишмә балалар сәнгать мәктәбе директоры итеп Татьяна Хәбибуллина билгеләнә. Укучылар саны 430 кешегә кадәр арта. 2012 елда рус фольклор бүлеге ачыла. Мәктәп коллективының «Рәсәй мәдәнияте» программасы буенча актив эшләве нәтиҗәсендә «Petroff» рояле сатып алына.

2013 елдан мәктәп Федераль дәүләт таләпләре буенча һөнәри программаларны тормышка ашыра башлый. Ә 2014 елда «Иң яхшы мәдәният учреждениесе» конкурсында катнашу нәтиҗәсендә уен кораллары алуга грант ала.

Тормышны матуррак ясау!

Бүгенге көндә мәктәптә 600дән артык бала белем ала, укытучылар составы – 28 кеше, алар арасында шушы ук мәктәпне тәмамлаган Татьяна Хәби-буллина, Анна Бикбулатова, Валентина Рәхимова, Карина Мостафина, Алия Сәфәргалиева, Екатерина Фәйзуллина бар.

Мәктәптә «Родничок», «Танцевальная феерия» һәм «Reverans» хореография коллективлары, «Белые росы» балалар ансамбле, «Душа Агафьи» вокаль-инструменталь ансамбле, «Заря» балалар вокаль ансамбле, «Звездочка» халык уен кораллары ансамбле бар, укытучылар катнашлыгында «Экспромт» халык уен кораллары ансамбле, «Малахит», «ANUK» һәм «Хумай» иҗат коллективлары үз эшчәнлеген дәвам итә.

Хәзерге мәктәп директоры Татьяна Хәбибуллинаның сәнгать мәктәбендә 30 еллык хезмәт стажы бар.

– Безнең мәктәп балаларга музыка, сынлы сәнгать, хореография аша төрле өлкәләрдә иҗади сәләтләрен ачу өчен зур мөмкинлекләр бирә. Укучыларыбыз иртәдән кичкә кадәр гаҗәеп сәнгать дөньясы белән таныша. Тормышта аларның кайсысы табиб, инженер, укытучы булыр, ләкин нинди генә һөнәр сайласалар да, алар тормышны ничек матуррак итәргә кирәклеген беләчәкләр! – ди ул.

Биш-сигез елга сузылган уку чорында укучыларның характеры формалаша. Алар максатка ирешү өчен тырыша, сәнгать мәктәбе сәхнәсендә генә түгел, ә район Мәдәният сарае, Заһир Исмәгыйлев исемендәге Уфа дәүләт сәнгать институты һәм Уфа сәнгать училищесы сәхнәләрендә һәм башка бик күп мәйданчыкларда сокланырлык чыгыш ясый.

Сәләтне ачыклау буенча инновацион мәйданчык

– Безнең мәктәптә иң мавыктыргыч тамаша – ул чыгарылыш сыйныф укучыларының йомгаклау аттестациясе. Биредә музыка коралларында виртуоз композицияләр башкарыла, рәссамнар югары дәрәҗәдәге картиналар иҗат итә, ә биючеләр хореографик композицияләр башкара, – ди Татьяна Владимировна соклану белән.

Моннан тыш, аның сүзләренә караганда, 400дән артык укучы узган ел нәтиҗәләре буенча лауреат һәм дипломант исеме алган.

– Балалар сәнгать мәктәбе өчен бу ел аеруча якты һәм нәтиҗәле булды, чөнки ул юбилей елы. Уку елы дәвамында планлаштырылган зур чаралар үткәрелде, – диде мәктәп директоры.

М. Акмулла исемендәге Башкорт дәүләт педагогия университетында безнең мәктәпнең сәнгать бүлеге укучылары һәм укытучыларының «Матурлык бүләк итәбез» дип аталган күргәзмәсе ачылды, «Акмулланың ак залында» да 70тән артык эш күргәзмәгә куелды.

Укытучылар һәм музыка бүлеге укучылары Заһир Исмәгыйлев исемендәге Уфа дәүләт сәнгать институты сәхнәсендә концерт белән чыгыш ясадылар. Шушы көннәрдә хореография бүлеге укучылары Келәш авылы Мәдәният йорты сәхнәсендә дә концерт куйдылар.

Сәнгать бүлеге укытучылары коллективы башлангычындагы «Хезмәт кешесе» дип аталган иҗади чара быел ачык бәйге статусын алды. Анда

Чишмә районы мәктәпләреннән һәм Дәүләкән шәһәренең сәнгать мәктәпләреннән, Кушнарен, Кырмыскалы районнарыннан һәм Языководан килгән 100дән артык бала катнашты. Максат – балаларның һәм үсмерләрнең игътибарын эшче һөнәрләргә җәлеп итү, Бөек Ватан сугышында хезмәт фронты, хезмәт тәрбиясе һәм ватанпәрвәрлек кебек төшенчәләрне аңлату.

Сәнгать мәктәбендә шулай ук «Башкорт композиторлары иҗатында халык җырлары һәм көйләре» дип исемләнгән ачык конкурс узачак. Анда катнашу өчен гаризалар җибәрелә башлаган, жюри утырышы һәм йомгак ясау 2023 елның гыйнварына планлаштырылган.

2022 елның октябрендә сәнгать мәктәбе «Пушкин картасы» проектын тормышка ашыруга кушылды. Бу теләге булган һәркемгә чараларда – концертларда, лекцияләрдә, осталык классларында катнашу мөмкинлеге бирә.

– Мәктәпкә «Сәнгать өлкәсендә яшь талантларны ачыклау һәм аларга ярдәм итү юнәлеше буенча инновацион мәйданчык» статусын бирү аеруча горурлык тудыра. Бу безгә үзебезнең мәктәптә Бөтенрәсәй дәрәҗәсендәге бәйгеләр үткәрү хокукын бирә, – дип хәбәр итте Татьяна Владимировна.

Мәктәптә сайт эше актив алып барыла, барлык яңалыклар турында тулы мәгълүматны «ВКонтакте» битендә белергә мөмкин: https://vk.com/dshi_chishmy.

Бу казанышларның барысы да безнең укытучылар коллективының һөнәрилеге, академик сәнгатькә тугрылыгы нәтиҗәсе. Мәктәп үзенең алтын юбилеен тантаналы концерт һәм сәнгать күргәзмәсе белән билгеләп үтәчәк, – ди Татьяна Владимировна.

Балалар сәнгать мәктәбе коллективын 50 еллык юбилее белән тәбрик итәм! Һәрвакытта да шатлыклы һәм тылсымлы ноталар яңгырасын, тамашачыларны дәртле биюләр сөендерсен, ә яшь рәссамнарыбызның кояшлы картиналары соклану уятсын! Мәктәп укытучыларына районыбызның, илебезнең һәм республикабызның мәдәни мирасын саклау һәм арттырудагы тырыш хезмәтләре өчен зур рәхмәт белдерәм. Сез яшь буынны хыялланырга һәм иҗат итәргә өйрәтәсез. Эшегездә илһам һәм кыю педагогик эзләнүләр телим!

Татьяна Хәбибуллина, Балалар сәнгать мәктәбе директоры