Чишмэ
-3 °С
Болытлы
Барлык яңалыклар
Төрлесеннән
2 февраль 2022, 16:15

Бала тугач 40 көн...

Бала туу – зур шатлык. Өйдәге һәркем нәни кеше тирәсендә бөтерелә. Әни кешене зур җаваплылык хисе биләп ала.

Бала тугач 40 көн...
Бала тугач 40 көн...

Сабыеның һәр сулышы мөһим яшь әнигә, һәр үзгәрешен тоемлап барырга омтыла ул. 

Бала тугач, медицина күрсәтмәләре белән бергә әби-бабайлардан калган гадәт-йолаларны үтәү дә мөһим. «Бала туганнан соң кырык көн» дигән сүз бар халыкта. 

40 көн буена баланы үзен генә калдырырга ярамый.

Җен алыштырмасын, дип шулай эшләнә. Әгәр баланы үзен генә калдырырга туры килсә, мендәре астына кайчы, пычак, көзге салалар. Бу гадәт «кайчы җен-пәринең юлын кисә, җен үзен көзгедән күргәч, куркып кача» дигән ышанудан килә. 

40 көн буена баланы чит кешеләргә күрсәтмиләр.

Беренче көннәрдән үк өйгә иң якыннар гына килә. Бала туу белән котларга килгән кунаклар бала янына кермиләр. Кемдер моны баланың энергетик аурасы формалашып бетмәү белән аңлата, кемдер күз тиюдән курка, чит кеше белән инфекция керү мөмкинлеге дә күздә тотыла. Күз тимәсен өчен, баланың башлыгына күз-мунчак элеп куялар.

Бала туу алдыннан бишек һәм бүтән җиһазлар әзерләнгән була. Бишектә үскән баланың нерв системасы нык булуын, аның тынычлап йоклавын инде табиблар да раслаган. Гадәт буенча, баланы беренче тапкыр бишеккә өйдәге иң олы кеше (дәү әни) сала.

40 көн булгач, сабыйның беренче чәчен алалар.  Моны гадәттә әти кеше башкара. Баланың чәчен ташларга ярамый, аны җыеп яндыралар яисә саклыйлар. 

40 көн буена яңа туган бала белән бергә яшь әнине дә өзлегүдән сакларга кирәк. Еш кына балага бик күп игътибар бирелә, ә әниләр читтәрәк кала. Әби-бабаларыбызның «Бала тапкан хатын-кызның 40 көн буена гомере кыл өстендә» дигән сүзе бар. Яшь әниләргә бу чорда эмоциональ яктан да, көнкүреш эшләрендә дә ярдәм кирәк.

40 көн узгач бала туган йортта «Бәби чәе» үткәрелә.

Бу вакыт аралыгында  бала энергетик яктан шактый ныгый дип исәпләнә. Кайбер балалар бу вакытта хәтта башларын да тота башлый. Шуңа күрә өйгә кунаклар чакырырга да ярый.

 

Бала тугач 40 көн...
Бала тугач 40 көн...
Автор:Айсылу Габидуллина
Читайте нас: